o岩o岩先發現冇share到第11個箍
趁lunch時間補文先, 相片要無了期等待家中電腦修理完先upload~
13/8換箍....已經成個星期喇
感覺良好, 只需用沖涼既時間(around 30mins)就已經適應新箍既壓力, 超快速呀!
近兩次換箍發覺牙仔郁動得慢左, 再冇明顯既轉變...有d心急~
牙仔仍然酸軟, 咬合有改變, 咬野時成日"撻Q",
比如珍珠奶茶既珍珠....家陣牙仔酸軟+咬合不正...好多時都咬唔到而直接吞. 又或者咬到口裡面d肉
另外覺得d牙越來越來大隻, 未箍牙時都唔覺...而家超覺, 好核突呀
上排仲要有少少"哨"....笑時覺得d牙想爆出黎一樣!!....真係冇誇張架
其實睇動畫都知遲早會有少少哨牙, 只係冇諗過會咁快啫!!
仲要俾男友笑我係"哨牙珍"....真係慘
-> 點解會有少少哨牙?
= 有一段時間要將門牙前面d牙箍開, 原因想將爆牙位置箍好, 完成後再將全排牙箍向後移
(之前提過醫生俾返動畫我, 不過CD-Rom壞左一路都share唔到, 遲d整好會share返)
講返上星期同中學同學食生日飯
突然<同學K>妙問 "你有冇打算箍牙呢?"......唔......心諗我箍緊囉
不過當時食緊野所以係冇帶箍, 而且上次見面時已經係多月前未上箍既事
佢唔知都唔出奇. 所以就照直答佢 "已經箍喇, 不過而家食野除左箍"
一講之下個個都好驚訝...問我做咩要箍, 總之就問左好多野啦
講講下<同學K>話佢都想箍, 下排牙有d唔齊(其實佢d牙好齊又白, 完全唔需要)....我立刻話佢搵錢黎side啦
之後佢話覺得我d牙有齊到, 特別係爆牙個位冇之前咁凹...又心諗"都唔知係咪架, 因為冇咩人察覺到包括我阿媽"
呢位<同學K>就係當年話我[觀音咀]o個個, 佢都有份令我想箍牙架
估唔到咁多年之後佢會問我有冇打算箍牙, haha...
成功箍好之後我會將呢個故事話返俾佢聽, 等佢知道佢一句[觀音咀]對當年我既弱小心靈做成幾大創傷!!
咩係[觀音咀]睇返呢到啦 -> 【點解要箍牙 + 前期分享】
月頭開始學人飲Collagen, 過左大半個月係時間報告下飲成點喇
首先回憶下飲左Orbis Citrus Collagen有咩好處先
撰自orbis官網 ( http://www.orbis.com.hk/top1.asp?cID=15&pID=35 )
高效的美肌飲料，每一小瓶就蘊含高達6,000mg膠原蛋白及500mg維他命C，有效顯減淡皺紋、幼紋、色斑、暗啞等肌膚問題。<- 剩係呢句已經好吸引我去飲, 再加朋友既推薦 = 唔試唔得!
本身眼肚位既細紋好勁, 試飲睇下有冇好轉
飲大約1個月就會見效...但我已飲左20日, 情況仍然存在, 少少改善既跡象都睇唔到!!
飲用頭1個星期已經出"粒粒" 仲要出o係塊面到 (平時只會o係額頭有粒粒), 另外較平時易出油同更易敏感!
男朋友話有可能學化妝時既化妝品唔o岩用都有影響, 我都覺得有機會, 不過學校用既係名牌同埋1星期先化1次妝...冇咁大影響掛~
<p.s. 我屬於敏感性皮膚 + 外油內乾>
令我唔會再飲的原因:
1. 價錢太貴, 就算經yahoo bid買平均都要$165一盒, 除開要成$16.50一支
2. 有BE sis話飲得多collagen會致肥, 雖然唔知信唔知得過, 不過為免箍牙時減少既磅數反彈, 駁唔過, haha
3. 皮膚冇明顯改善 (曾經有過曙光, 有1日家姐話我d皮膚靚左, 不過第2日睇真d係幻覺囉!!!!)
4. 味道怪怪的, 雪凍左會較易入口, 不過都係怪
5. 有其他代替品 (有機會再share)
17.08.2009 化妝班 Step 1 - Lesson 2
今堂主要學修眉, 畫眉同開眉筆
因為Isa叫我地轉partner, 所以返到去第1時間就係搵partner
上堂part開既同學仔&其他人都搵到伴,
得返我一個咋 (好慘....總之叫多個friend陪我學啦), 要等另一個同學返先開始得...
等到大約7:40分, 終於開始喇
首先要化底妝, 化到咁上下...Isa就教我地開眉筆
首先要準備一把cutter同一支新既眉筆
未學之前都唔知眉筆要開, 以為就咁畫就ok...haha
削筆既技巧都幾難, 好易會整斷支筆
好彩我一take ok, 不過我個partner就冇咁好彩, 削左幾次都斷, 完成後支筆變到好短!
開完眉筆就教修眉...好難呀, 我怕會修到一"忽忽"
化好底妝就開始幫partner修喇, 佢本身有修開, 已經有眉型
我只係幫佢修修d雜毛, 好快攪掂, 總算ok啦
之後就教眉筆, 眉粉, 眉gel, 睫毛膠水(gel眉尾) 等既用法
今堂學到好多野呀, 原來畫眉都好難, 有時間要多多練習~
8.15 我的26歲生日...(好老呀~~!!!)
因為有同事都係8月生日, 所以每年o係佢生日前公司同事都會幫我地一齊慶祝
年年都係飲茶+切蛋糕, 不過每年都同人share而且又未到自己生日
感覺始終麻麻地...
8月13號屋企人話幫我慶祝問我想食咩
我就揀左o係屋企打邊爐, 放工時仲滿心歡喜返屋企
點知阿媽話家姐唔舒服取消, 於是求其煮d野食就算....
o.......個一刻真係幾唔開心, 不過算啦, 一家人一齊食飯都好難得!
8月14號晚, 藉口話送生日禮物俾自己就同男友仔去瘋狂shopping~
買左好多野...好耐都未試過喇~ (遲d再share買左d乜啦)
8月15號正日就同男友仔去左慶祝 -> 請收睇第二回啦~
尋日係學化妝既第1堂
原來課室既位置都幾入...仲以為好近百利
好彩有男友陪我一齊去, 如果唔係我一定搵唔到
上到課室就見到導師Isa, 第一次見佢真人, 真係有"叮"一聲既感覺
心諗"點解可以咁靚, 仲要做左人地既媽咪"
課室環境唔錯, 有齊各樣化妝工具
連堂上既化妝品都係名牌, 真係冇報錯名
本來知道好多同學仔都係孖住一齊學, 都怕自己一個識唔到人, 不過上到去見另一個同學仔都係一個人
咁就一齊坐...之後仲互化tim, 好彩有佢咋
今堂學左 makeup base + 粉底 + 遮遐 + 化妝掃清洗
我地一邊聽同睇Isa示範, 就一面寫notes, 真係返學都冇咁勤力, haha
點知到自己落手化既時候就慘...個腦一片空白
有彩有同學仔+Isa既提點, 下次我會努力留心d
先係同學仔幫我化先, 化完真係靚左好多
連我額頭既巨型暗瘡都遮到, 勁
輪到我就有d雞手鴨腳, 幫人化既時候要企右手邊架
但係我就控制唔到, 成日走黎走去...
化完Isa話粉底個色偏白, 仲有眼蓋唔記得用遮遐
o...下次我會小心
同學仔冇落妝就走, 真係開心 (後悔唔記得影相, 下次一定要影返)
總括上堂學到野之餘又開心, 仲有Isa同Bonnie都好好人, 期待下星期一既來臨~
我要繼續努力, 相信唔會係3分鐘熱度!!
今晚就係Step 1 o既第1堂
等左2個月喇. 終於等到....真係好緊張又好興奮
今次得到家人, 男友同朋友支持, 希望自己唔會3分鐘熱度啦
不過有d擔心自己一個去學, 怕d同學仔個個都成雙成對....
人地話女人唔keep好易老
話老唔老, 不過d皮膚越黎越差..特別係眼紋超明顯!!!!
之前同朋友講開呢個問題, 佢就介紹我飲collagen
話佢個朋友自從生完BB之後皮膚就超差, 又有好多暗瘡
但隔一排佢同事d皮膚慢慢變好, 冇暗瘡之餘仲白裡透紅
原因就係飲左collagen wor...
於是佢就介紹我飲, 睇下可唔可以改善d眼紋
我朋友佢自己飲左3個月就覺得飲完毛孔細左好多
攪到我心郁郁好想試呢~
佢介紹既係Orbis Citrus Collagen, 大概要飲1-3個月先知有冇效
1盒有10支, 專門店賣緊$239蚊1盒...都幾貴wor, 仲要日日飲
即係一個月要7百幾蚊..好唔捨得呀
咁o岩上yahoo bid!見到有人放$490蚊3盒...見平咁多就姑且一試啦
朋友話飲3個月work就可以停或者隔個月飲..
尋日開始飲第1支
味道話係西柚味, 飲落覺得酸酸地, 有d怪....還可以接受啦
質感: 普通飲品, 唔係太"杰"身
飲後感: 覺得個人好"慶",有d發熱...唔知係天氣熱定係點呢? 其他維持不變
希望快d見效啦...遲d再update進度
官網講到好好咁架, 有興趣去睇睇下!
最強美肌配方
保持肌膚彈滑細緻高效的美肌飲料，每一小瓶就蘊含高達6,000mg膠原蛋白及500mg維他命C，有效顯減淡皺紋、幼紋、色斑、暗啞等肌膚問題。
●6,000mg膠原蛋白
膠原蛋白含有保持肌膚彈性及緊緻不可或缺的蛋白質。6,000mg成份能充份補充每日因紫外線傷害及年齡增長而流失的膠原蛋白。
●500mg維他命C
維他命C具有抗氧化及刺激膠原蛋白增生的功能，加倍提升肌膚的彈性。
●4種草本精華
蘊含迷迭香精華、甘菊精華、香蜂草精華及月桃葉精華，能維持肌膚健康，抑制自由基的傷害，令肌膚回復水嫩緊緻。
http://www.orbis.com.hk/top1.asp?cID=15&pID=35
之前join BE既團購買左La Femme胭脂 + NYX lipstick
等左成大半個月先到貨, 脛都長埋呀!!
La Femme
網上好hit既 La Femme胭脂, 好評如潮
見價錢平, 當然要買兩粒試下啦
睇左好多sis既swatch, 最後揀左 Dusty Rose + Pink Velvet
就咁睇已經覺得好靚, 個人偏愛Pink Velvet
o岩晒返工化少少妝, 面色紅紅, 精神d呢
我比較易敏感, 有時用唔o岩化妝品or護膚品就會攪到塊面又痕又"鞋恰恰"
lafemme已經試用左幾次, 暫時都冇敏感呢....so good~
La Femme 手背試色
Dusty Rose: 較易上色, 輕輕一抺已經好顯色, 對我黎講上面就太深...仲要比妹妹話似"馬騮patpat", haha
Pink Velvet: 相比下就較難上色, 要抺幾次先有下以效果
不過上到面就好好睇, 少少粉紅色, 好自然既面色
熱門色號, 好多sis都有入手(推介)
p.s. 試色係用手抺架, 試過用掃上面都ok架
味道: 基乎冇味既...適合我唔like太香既化妝品
價錢: 每粒$37.50, 之後有sis攪只係$35粒咋
總結好抵用, 下次會入多幾個, 就算自己用唔晒第時學化妝都o岩用掛...haha
NYX
來自USA既NYX今期好Hit
訂左出名既lip stick, 本身訂埋lipgloss架, 不過冇貨(失望!!)
平時好少用lipstick, 所以只係訂左兩支試下
官網swatch好唔準, 都係參考過sis試色先揀到
訂左 #529 Thalia + #544 Hermes
NYX手背試色
#529 Thalia: 顏色好靚, 冇閃粉, 質感幼細好滑又唔乾
輕輕塗一層已經好靚, 塗兩層有豐唇效果(塗兩層我覺得我個唇厚左)
#544 Hermes: 睇sis試色覺得好靚, 不過到手有d失望, 顏色太深
塗完覺得得咀好黑, 一d都唔靚, 要打入冷宮!
味道: 有少少藥水味, 上咀一陣就散, 我覺得可以接受
價錢: 每支US$2, 加上做緊20%off, 約hk$35兩支, 好抵玩
總結: 好用, 已join另一團購補買lipgloss同eyeliner...haha
終於換第10個箍喇
計落已箍左3分1個療程
我一共要箍29個, 即係仲剩19個=有排....我要加油呀!!!
今次換箍好順利...易除易帶
不過都有d痛...特別係以下呢幾隻牙
唔知係咪箍完爆牙o個邊而家到另一面呢??
痛只係唯持左2日, 而家已經冇事lu
覆診時醫生只係話我d牙有郁動, 係咁"意"檢查左一陣就走得, 話下次先要偷位
今次拎左兩對新牙箍, 下次要到8月尾先覆診喇
呢排覺得d牙開始郁得好慢, 冇之前咁明顯
你地睇覺得點呢?
