活自由行の 東莞塘廈三正半山酒店 → 住宿+飲食篇

 終於去到酒店，都幾多人check-in喎，職員都好有禮貌...環境唔錯呀，好想快d睇下間房有幾正，快d跳落水呀

我地住嘅係親水房B區，由check-in lobby 去房間要搭golf car...好似去咗希吉一樣，好好feel呢~~

去到房喇....嘩一聲叫咗出黎....好靚呀又好大，祈待已久嘅大泳池我地黎喇...yeah！

 

最失望係冇浴缸呀...如果游完水之後浸個泡泡浴就正喇

package包嘅自由晚餐，食物種類都幾多不過味道就......普通啦

復活自由行の 東莞塘廈三正半山酒店 → 交通篇

行程〈香港→深圳→東莞樟木頭→塘廈三正半山酒店〉



香港→深圳︰

最方便當然係搭火車啦…羅湖站落車

深圳→東莞樟木頭︰

羅湖過關後去深圳火車站買車票

車票有分兩種(都有劃位) - 一等軟坐(即頭等, 坐位較大及寬敞)及二等軟坐，除位坐唔同外，二等軟坐車卡會有其他乘客企位，因為miss咗自己班次嘅乘客可以一天內照搭其他班次不過要企囉。

東莞樟木頭→塘廈三正半山酒店︰

酒店有接駁車接送，30分鐘一班，班次唔係正點架…要留意！



復活節假期有4日咁多，頭兩日(10-11/4)我同阿爸就決定去塘廈三正半山酒店玩下，本來想去澳門or嘉輝會，不過兩度都去得太多唔想再去！

諗諗下之前同事極力推薦呢間酒店，讚到天上有地下冇，就趁今次有機會去啦…

10/4 一早10點起身食少少嘢由骨場出發去深圳火車站買車票，去到呆咗…好多人排隊，一時唔醒起可能d人返鄉下拜山呀，早知前一日買定飛先啦！！
10點幾等到11點都未到我地，排排下後面傳來一d炒賣嘅聲音，原來有幾個女人喺度轉售車飛，佢地係香港人好似話趕住去廣州機場包車快d所以唔搭火車，排我地後面嘅香港人家庭就幫佢地頂咗幾張(家庭去廣州的)，之後仲剩有兩張問我地要唔要……對話如下

阿爸︰「我地去樟木頭火車站喎,，你張飛去唔去到？」

女人甲︰「等我睇下中途站停唔停先 (佢手上有火車時刻表，有晒開車時間同停咩站)，好似唔停喎！」

阿爸︰「咁算啦…(其實仲有10個8個就排到我地)」

女人乙︰「一係我問下售票處先啦……(佢一支箭跑過去又一支箭跑返黎)，ok喎，去到架！」

阿爸︰「唔…咁好啦，幾多錢？」

女人乙︰「是但啦…我地趕住走…一係40港幣1張啦」

阿爸︰「哦…」

女人乙︰「張飛開11:35架，我地今朝10黠排先買到，一陣到你地排到可能要買下晝d飛喇」(聽到佢咁話即刻買啦)

之後我地就興高采烈咁走去候車處等上車，發現去廣州東嘅車飛成75蚊人仔，而我地去就樟木頭40蚊，計落都冇蝕……

等車時睇到火車時間表，見到我地班車冇話經樟木頭，諗諗下發現唔對路，即刻走去問閘口check車飛嘅職員…..haha…佢竟然唔埋我仲叫我自己睇，好彩有個嬸嬸同我地話我地呢班車唔o岩去唔到樟木頭…下….真係大滴汗，仲以為買好好嘢…點好呢?? 之後佢教我地上是但一班經樟木頭嘅車都去到…唉！好無奈囉，諗住好心幫返香港人，點知…

等到下班車已經12點幾喇…終於上到和諧號火車，好新好快呀，可惜我地冇位坐。

只需20分鐘就去樟木頭喇….

去到搵唔到接駁車嘅站，原來要穿過火車站對出嘅停車場行過對面一個細嘅停車場先係，有個公厠同小買部架！等左成半個鐘先有車，去到酒店都1點幾喇...


(留意樟木頭三正半山酒店同塘廈三正半山酒店都係同一個位等車...小心上錯呀！)

等車時影的

復活自由行の 東莞塘廈三正半山酒店 → 前言

朋友問﹕「黎緊5．1有3日假期去邊玩呀？」

我答﹕「又去？唔去啦。」

朋友問﹕「咩又去呀？你去左邊呀？難得3日假都唔去玩，唔似你喎，HAHA」

我答﹕「復活節假去咗啦，邊有咁多錢成日去玩！」(箍牙+儲錢+俾家用 ß 我好窮了 :P )

朋友回(無奈中)﹕「咁去咗邊呢？」

我答﹕「返左祖國。」

朋友問﹕「又返大陸？成日返去有咩咁好玩呀？去深圳揼骨？」

我答﹕「係呀，去咗3日3夜頭一晚去咗揼第2日去東莞。」

朋友問﹕「東莞？新嘢喎…有乜玩？」

我答﹕「去左塘廈三正半山酒店住1晚當游下水relax下，冇特別嘢玩。」

下冊唔知幾多字….佢好有興趣不停問又要我send相俾佢睇，橫掂都係不如寫個post俾大家share下啦 :p

連結 ->  復活自由行の 東莞塘廈三正半山酒店 → 交通篇

【箍牙實況‧TRAY# 3】

 

　尋日去左覆診同拎新牙箍，講講覆診覆成點先！
先同醫生自首tray# 2 俾我整難咗！不過佢叫我唔使咁驚，因為我爆牙o個位除箍時一定會易難d，如果難咗照帶都冇問題。

至於牙癢同牙痛問題，佢話係正常，因為每隻牙郁動時都會有不同嘅反應……咁都好d，初初牙痛時仲以為有蛀牙tim！

檢查時佢讚我乖，話我冇偷懶有箍足時間。緊係啦……為咗靚同俾咗錢…辛苦d唔食嘢都要。

佢話要偷位，之後就喺右面下顎第1隻大臼齒同第2隻小臼齒之間佢俾磨咗一條隙，比較之前用牙線清潔時而家易好多，所以呢條隙都應該幾大下囉！

今次拎咗3副新箍，下次要6月先覆診喇~~



TRAY# 3

因為覆診後會去食晚飯，所以冇上新箍。

照平時一樣出街食飯後簡單清潔口腔就會帶上牙箍，今次都唔例外…….不過今次我帶左成5分鐘先成功，同埋好辛苦….帶咗上去感覺到好有壓力同好箍！呢種感覺之前都有，但今次強烈得多……好彩帶咗1個鐘到已經開始習慣呢種感覺，點知返到屋企想除箍刷牙時惡夢就開始喇…

個箍除咗好耐好耐，起碼有10分鐘先除到(舊箍只需1分鐘)…好辛苦，除到口水又湧晒出黎手甲就反都唔得，o個刻有d想喊嘅感覺，想求救又冇人幫到我，點算呀???

於是我慢慢除續少續少”蚊”出黎先除到，除出黎o個下真係鬆左一口氣！！

到目前為止，箍牙生涯中最辛苦算係呢次~

第3個箍有d突出黎嘅嘢...醫生話以防個牙箍鬆用黎加attachment，不過我唔使加

【箍牙實況‧TRAY#1 & #2】

22/3/09收到診所通知牙箍已經到港，可以隨時去上箍，於是約左27/3。

等拎箍o個幾日嘅心情真係既興奮又緊張，數下手指2月尾印模都等左差唔多一個月先印好，咪話唔心急！

等了又等，終於到27/3…..見到醫生佢第一句同就我講 ：『好似唔夠位，可能要剝牙喎』

吓....聽到簡直係晴天霹靂，check同印模嘅時間佢講過我唔需要剝，

講過我就當真架啦！灰爆之際，佢又話睇真D都係唔使...Oh...玩嘢咩 ><

至於點解我唔使剝牙咁好，HAHA...因為我比正常人少左5隻牙，

分別係4隻智慧牙同1隻下則門牙 (見圖)，唔箍牙都唔知自己少左咁多隻牙，

好彩唔洗剝咋，再剝我會變冇牙婆架！


我就係冇左圖中紅色圈嘅牙

TRAY#1

第1個tray由27/3開始帶兩個星期每日帶22個鐘，初初帶有d唔慣覺得有嘢箍住好唔舒服，又唔可以隨便食嘢，食嘅時候又要除底先食得…好煩吓！

不過醫生話可以帶住食嘢，於是試下…..點知原來係唔work，d食物殘渣攝晒落牙箍同牙中間嘅空位都幾唔衛生。

由於限制每日要帶22個鐘，所以食嘢次數減少好多，平時好鍾意食零食嘅我簡直辛苦過乜咁，返工做嘢無聊或肚餓時都唔食得嘢，每日剩係食午餐同晚飯，我自己set咗午餐除30-45分鐘、晚飯除1個鐘。除咗呢兩餐外，其他時間真係冇食嘢，一來帶住牙箍唔食得、二來唔想食(箍咗牙之後食慾減少)，所以體重都輕咗少少少少 (hahaha…可以減肥真係開心)。

帶咗一個星期，覺得下顎d牙同牙肉有d癢，成日想咬嘢十足BB出牙仔咁，除左箍食嘢d牙又冇力咬唔到，好辛苦呀…..不過諗返轉頭唔知係咪d牙郁緊呢？(阿爸話﹕箍咗1個星期咋邊有咁快呀 <— 灰咗 >.<)

TRAY#2

第2個tray由9/4開始，已經完全習慣。

帶咗3日之後，有意外發生，我整爛咗個箍！！可能係我除嘅時候太大力爆牙o個位裂開咗….死啦，點算好？仲要帶多10幾日，點捱呢？

即刻打俾醫生求救，佢話就算斷開咗兩段都可以照帶一樣work的，既然佢咁講就放心晒啦…不過除既時候要特別小心，萬一真係斷開咗兩段就唔係咁好啦。

聽日就去覆診同拎新牙箍，好想快d知道d牙有冇郁到 ~

 

【點解要箍牙 + 前期分享】

我點解要箍牙

整體上我覺得我D牙都唔算太差，只係上顎有1隻爆牙同下顎有一隻比較歪，而且笑嘅時間睇唔到下顎d牙，所以好多人都叫我唔洗箍唔好 ”side”錢……

早在中三之前影相我都唔會 “E” 起棚牙，點知就俾人話笑得唔自然， 個咀”木”左似 「觀音咀」，OH! NO….咩係觀音咀呀！ ！ ！…….好啦，到升中四之後我 “E” 起棚牙影相， D人又話我好似冇左隻牙咁…..唉…..，俾人咁講真係好唔開心架！雖然係咁都未令我有衝動去箍牙。

直至上年妹妹走去箍牙 (佢同我一樣都有爆牙仲比我嚴重)，箍嘅係透明粒粒同幼鋼線，相比傳統箍牙冇咁礙眼，見佢箍攪到我心思思想箍埋一份，haha….

後來得到媽咪嘅approval ，阿爸嘅朋友又識得一個牙醫，所以就約個時間去check check，起初打算同妹妹一樣箍透明粒粒，一來靚d二來平d，點知一check 之下我竟然比較適合箍隱適美(Invisalign)，心諗唔係呀嘛好貴架wor同心理上覺得傳統箍牙會唔會箍得好d呢？！

經醫生解釋之下Invisalign 既功效同傳統箍牙一樣，仲要美觀同方便D，佢俾左個special offer我，呢個offer非常吸引之餘又可以分期，最終考慮左2日就決定箍 ^^ 

前期分享

1.      約見醫生照 X-Ray及睇分析動畫了解是否適合箍隱適美，箍幾耐、洗唔洗mock牙同費用 (普通診所check+照X-Ray要收約$1,000，如果幫襯返佢就會扣返)

2.      決定後做牙齒倒模同影相作記錄

3.      剝牙同等拎牙箍 (因為牙箍要send去美國做所以要等約一個月時間咁耐) 我唔需要剝牙>
4.      拎牙箍時會確定知道要用幾多個箍，每個箍要帶2個星期

5.      定期覆診同拎新牙箍

 

【第一次】

第一次    = 第一次寫Blog

點解要寫Blog呢？？

起源於上年家姐介紹話有個Blog好好睇好攪笑，o係公司食lunch悶悶地就睇下啦，點知一睇之下果然冇介紹錯，陪住我食lunch不特止，做做下野都要偷偷地睇，真係好似中毒咁好誇張﹗

之後有次上網搵資料，點知誤打誤撞睇到我一位將會結婚既朋友既Blog，見佢好有心機同Blog友share婚禮籌備既過程，真係好sweet呀！

自止令我發現原來睇Blog都可以好有樂趣，唔知寫Blog又係點架呢？

呢排心血來潮好想自己寫返一個，想將我同阿爸 (我叫男朋友的暱稱，佢叫我做阿囡，haha ….好低能) 又或者自己發生既有趣事，無聊事等等一一記低。